Kaixo, ikasleok:

Hau da hau ikasturte xelebrea aurtengoa! Nork esango zigun martxoaren 10ean, ohiko eskolak bertan behera utzi eta ia-ia eskuak poltsikoetan, etxeratu beharko genuela. Izan ere, pandemia zela eta, amaitu arte ezohiko bideari eutsi behar izan genion eta telelanean hasi.

Euskaltegiak ahal izan duen moduan jarraitu du aurrera eta zuek ere halaxe egin ahal izan duzue etxean teleikasten, betiere irakaslearen gidaritzapean. Dena dela, ezin ukatu telelana edota teleikastea nekeza dela edonoretnzat.

Ez dakigu nola datorkigun datorren ikasturtea, baliteke ezohiko egoeran aritu behar izatea, koronabirusak gurekin darrai eta; hala ere, saiatuko gara molde berrietara egokitzen bai eskolekin jarraitzeko, bai guztion segurtasuna bermatzeko.

Oraintxe dakigun bakarra da uda iritsi zaigula eta berekin aisialdiaz gozatzeko parada. Bitartean, mila esker guztioi!!